Duminica 31 ëd Gené 2021 – Leture bìbliche an piemontèis

Duminica ël 31 ëd Gené 2021 – Quarta duminica apress ëd l’Epifania

Leture bìbliche: Salm 111; Deuteronomi 18:15-22; 1 Corint 8:1-13; March 1:21-28 con le vos ëd Pàul Castlin-a, March Moretti, Màssim Marietta, Anin Ferrero, Gianni Marietta.

Le sircostanse anté ch’is trovoma ancheuj an òbligo a isolesse da j’àutri, a tajesse fòra da la vita dla società. A l’isolament a-i é ‘l rìsigh an quàich manera ëd costumess-ne. Chi ch’a dòmina la società as na profita për mej controlene. Tutun. për nojàutri ij cristian, radunesse coma comunità a l’é essensial. Ij mojen ch’i l’oma për arpiassé ‘l rescontr an tra frej e seur a son mej che nen, ma a peudo nen paragonesse a la richëssa dël rescontr ëd person-a. A l’é ansema a j’àutri ch’i vnuma instruì ant la Paròla ‘d Nosgnor e ch’i chërsona ant la fej. A l’é an comunità ch’is esercitoma ant le virtù cristian-e. Le leture bìbliche ancheuj a sélebro e a stabilisso con autorità ij prinsipi dla dimension comunitària dël pòpol ëd Nosgnor.

I. Salm 111

La radunansa dël pòpol ëd Nosgnor a l’é na sorgiss ëd granda gòj. Tùit ansema i laudoma e ringrassioma Nosgnor. Ansema Dé an instruiss an Soa Paròla, ch’a l’é tanme ‘l mangé ëd nòst ëspirit. Ël Salm 111 a sélebra e magnìfica la dimension comunitària ëd nòstra fej e j’intension ch’a l’ha.

“Laudé Nosgnor! Con tut mè cheur i laudrai Nosgnor ant la radunansa ‘d Sò pòpol, coj ch’a-j son divot. Lòn che Nosgnor a fà a l’é pròpi anciarmant! A son ëd còse ch’a merito d’esse bin peisà da coj ch’a l’han la gòj d’esse ij sò amis. An tut lòn ch’a fà, Nosgnor a dà la dimostrassion ëd soa glòria e majestà. Soa giustissia a faliss mai. Nosgnor a l’é misericordios e pien ëd compassion. A fà ‘d còse ch’ a saran sèmper arcordà. A-j dà da mangé a coj ch’a-j van dapress; as arcòrda sèmper d’esse gropà a lor da n’aleansa. A sò pòpol Nosgnor a l’ha mostraje soa granda potensa an fasendje don ëd la tèra ‘d d’àutre nassion. Tut lòn ch’a fà a l’é bon e giust e ij sò comandament a son degn ëd fiusa. A son ver e frem për sèmper; a l’han d’esse scotà coma ch’as dev e con diligensa. Ël timor ëd Nosgnor a l’é ‘l fondament ëd la vera sapiensa. Tuti coj ch’a-j dan da ment a l’han ëd bon sens. Laudelo për sèmper!”.

Andoma a scoté adess ël Salm 111 cantà an italian, ant la speransa ‘d podèilo avèj un dì ëdcò an piemontèis!

II. Deuteronòmi 18:15-22

Ant la prospetiva dla Bìbia, ij profeta a son nen mach coj ch’a fan ëd predission, quand ch’a l’é necessari, ma a son dzortut ij mediator an tra Dé e Sò pòpol. Për mojen ëd lor ël pòpol ëd Nosgnor a l’é istruì, dotrinà, a vive conform a Soa volontà. La responsabilità ch’a l’han a l’é tant granda che, s’a la porto nen anans con fidelità, o fin-a a diso ‘d propòsit ëd faussarìe, a l’é ‘n pecà grevissim. Cost passagi an parla dle responsabilità dij profeta. A preanonsia ‘dcò ‘l Profeta per ecelensa, la Paròla ‘d Dé cha l’é fasse n’òm: ël Signor e Salvator Gesù Crist.

Mosè a l’ha seguità a dì: “Nosgnor vòst Dé a farà seurte fòra d’an mes a voi, da ‘n mes a vòstri compagn israelita, un profeta coma ch’i lo son mi: i l’avreve da scotelo. A l’é sossì ch’i l’eve domandà a Nosgnor vòst Dé quand ch’i j’ere radunave ai pé dël Mont Sinai. A Nosgnor vòst Dé i l’avìe ciamaje ‘d nen torna sente soa vos, o ‘d vëdde col grand feu, për tëmma ‘d meuire!”. Anlora Nosgnor a l’ha dime: ‘Lòn ch’a l’han dit a l’é giust’. Për lor i farai seurte d’an mes ai sò compagn israelita un profeta coma ti. I butrai mie paròle ‘nt soa boca e chiel a dirà al pòpol tut lòn ch’a-j comando ‘d dì. Col ch’a scota nen ij mëssagi che ‘l profeta a proclama a mè nom a l’avrà da fé ij cont con mi. Tutun, ël profeta ch’a dìs ch’a parla a mè nòm, ma che lolì a l’é nen vera o ch’a parla a nòm ëd n’àutr Dé, a dovrà esse condanà a mòrt. Peul esse ch’it domande drinta ‘d ti: ‘Ma coma fom-ne a savèj se soe paròle a l’ha nen dije ‘l Signor?’. Se ‘l profeta a dis ëd parlé ‘nt ël nòm ëd Nosgnor, ma soa predission as compiss nen, lolì a veul di ch’a l’é nen ëstàit Nosgnor a deje col mëssagi. Col profeta a l’ha parlà sensa mia autorità e i l’eve pa da avejne tëmma”.

III. 1 Corint 8:1-13

Fé part ed na comunità cristian-a a veul dì che mincadun a l’ha da pijesse soen dij sò frej e seur ant la fej. Sossì a veul dì ëdcò ‘d ten-e an considerassion la condission ëspiritual ëd mincadun e fé tension ëd nen sagriné coj ch’a son déboj ant la fej, ma ‘d companieje con passiensa a chërse. Sossì a l’é lòn ch’an esòrta l’Apòstol an ës passagi. Ël contest anté che cola gent a vivìa antlora a l’era different dal nòstr, ma ‘l prinsipi ch’a stabiliss a l’é ‘l midem, a resta valid ëdcò ancheuj.

“Parloma adess ëd la carn sacrificà a j’idoj. I savoma bin che tuti a diso d’avej “la conossensa” a sto rësguard, ma cola conossensa a men-a a vantess-ne, mentre ch’a l’é l’amor a esse d’edificassion. Coj ch’a chërdo ’d conòsse coma ch’a stan le còse, ancora a san nen coma ch’as l’ha da conòss-je. Lòn ch’a pì a conta a l’é l’amor, e coj ch’a veulo bin a Nosgnor a son arconossù da chiel. Për lòn ch’a riguarda ‘l mangé ‘d còse sacrificà a j’idoj, i savoma bin che, an ësto mond, l’idol a l’é gnente e che ëd dio a-i na j’é mach un. Sicur a-i na son vàire ch’a son ciamà dio, sia ant ël cel che an sla tèra, coma che an efet a son tanti coj ch’a rendo l’adorassion a vàire ansidìt dio e sgnor. Contut, nojàutri i savoma ch’a-i é mach un sol Dé, ël Pare, ch’a l’ha creà tut lòn ch’a esist e noi i vivoma për chiel, e a-i é mach un sol Signor, Gesù Crist. Për sò mojen Nosgnor a l’ha fàit tut lòn ch’a-i é. A l’é da chiel ch’i l’oma arseivù la vita. Ora, costa sòrt ëd conossensa a l’é nen dàita a tuti. A-i é ‘d coj ch’a son costumà a l’idolatria e ch’a mangio la carn sacrificà a j’idoj coma s’a fossa stàita për dabon ësmonùa a lor, e parèj, soa consiensa, fiaca coma ch’a l’é, a-j fà sente coma s’a l’avèisso comëttù un pecà. Ora, a l’é nen lòn ch’as mangia ch’an fà esse agreàbil a Nosgnor, përchè i përdoma gnente s’i la mangioma pa e i vagnoma gnente s’i la mangioma. Donca, pijeve varda che cola vòstra libertà a sia nen d’antrap a coj ch’a l’han na fé fiaca. Përchè se quaidun che ancora a l’ha nen la conossensa ch’it l’has ti, at vëdd a tàula ‘nt ël templi ‘d n’ìdol, a sarìa-lo nen ancoragià a violé soa consiensa an mangiand ëd carn ch’a l’é stàita smonùa a n’idol? Parèj, për colpa dla conossensa ch’it l’has, as përdrà col ch’a l’é fiach, ma Crist a l’é mòrt ëdcò për col frel-lì. Quand ch’i feve ‘n pecà parèj contra ‘n frel e ch’i ferisse soa consiensa, ch’a l’é fiaca, i feve ‘n pecà contra Crist medésim. A l’é për càusa ‘d lòn ch’i diso che se ‘d ròba da mangé a fà casché an pecà un dij mè frej, i mangerai mai pì ‘d carn, mach për nen fé pecché mè frel.”

IV. March 1:21-28

Ël Signor e Salvator Gesù Crist a fasìa onor a la radunansa demodari dël pòpol ëd Nosgnor e a-i era sèmper present. Quand che chiel a-i era, a capitavo sèmper ed ròbe armarcàbij. Soa dotrin-a a tocava ij cheur e le ment e a l’era na potensa ‘d liberassion. Sossì i lo vdoma an ës tòch dl’evangeli. An arciama a sicuress-ne ch’a sìa Soa Paròla, ch’a l’é sèmper importanta, ch’a sìa l’ùnica ch’as sent l’ora che, coma ‘d cristian, is ancontroma.

Peui a son intrà a Cafàrnao, e sùbit dòp – a l’era un Saba – intrà ch’a l’era ‘nt la sinagòga, Gesù a dotrinava E tuti as na maravijavo ëd soa dotrin-a, përchè a-j mostrava con gran competensa, e nen parèj dij magister ëd la Lej. Ora, as trovava là, ant la sinagòga, n’òm tormentà da në spirit salòp ch’a l’e butasse a crijé, disend: “Ha! Còsa a-i é-lo tra ti e nojàutri, Gesù ‘d Nasarèt? It ses-to vnù për dësblé lòn ch’i foma nojàutri? I lo savoma bin chi it ses. Ti ‘t ses ël sant ëd Dé”. Ma Gesù a l’ha arbufalo fòrt e a l’ha dije: “Stà ciuto e seurt fòra da col òm!”. Anlora lë spirit danà, tormentand-lo e crijand a tute fòrse, a l’é surtì fòra da col òm-là. Tuti a na son restà sbërlondì, ëd manera che as domandavo tra ‘d lor: “Còs’è-la sta ròba-sì? Che dotrin-a neuva a l’é mai costa? Col-lì a comanda con autorità fin-a a dë spirit danà e lor a j’ubidisso!”. E soa reputassion a l’é spantiasse ‘d colp ant ij paìs tut dantorn la Galilea.

Orassion

Nosgnor, Tut-potent e etern! Ti ‘t governe tute le còse, sìa an cél che an sla tèra. It pregoma: sie misericordios e scota le sùpliche ‘d tò pòpol, e ant ël temp d’ancheuj dane toa pas; për Gesù Crist, nòst Signor, ch’a viv e regna con ti e con lë Spirit Sant, un sol Dé, ora e sèmper. Amen.

Scrivi un commento

L'indirizzo email non sarà pubblicato.


*